(ភ្នំពេញ)៖ នាយករដ្ឋមន្ត្រីកម្ពុជា សម្តេចតេជោ ហ៊ុន សែន បានធ្វើការបកស្រាយចំពោះចម្ងល់របស់ប្រជាពលរដ្ឋម្នាក់ដែលបាន comment ក្នុងទំព័រហ្វេសបុករបស់សម្តេចអំពីករណីការធ្វើតេស្តរកមេរោគកូវីដ-១៩ នៅតាមពេទ្យឯកជនមានតម្លៃថ្លៃ ដោយសារតែពេទ្យឯកជនបានគិតបញ្ចូលទាំងថ្លៃសម្លៀកបំពាក់ពេទ្យពាក់ពេលធ្វើតេស្ត។ សម្តេចតេជោ បានណែនាំប្រជាពលរដ្ឋឱ្យទៅតេស្តរកមេរោគកូវីដ-១៩ នៅតាមទីតាំងដែលរដ្ឋរៀបចំ ប្រសិនបើការតេស្តនៅតាមឯកជនមានតម្លៃថ្លៃ។ ការឆ្លើយតបរបស់សម្តេចតេជោត្រូវបានធ្វើឡើងនៅល្ងាចនៅថ្ងៃទី១៥ ខែសីហា ឆ្នាំ២០២១នេះ។

សម្តេចតេជោ បានបញ្ជាក់ទៅម្ចាស់គណនីហ្វេសប៊ុក «Bou Pheakdey» ថា «ខ្ញុំក៏បានសួររឿងនេះដែរ។ ចម្លើយត្រឡប់មកវិញ គឺផ្នែកឯកជនមិនមែនគិតតែឧបករណ៍ធ្វើតេស្តទេ គឺគិតទាំងតម្លៃខោអាវពេទ្យ ដែលពាក់សម្រាប់ធ្វើតេស្តផងដែរ។ ចម្លើយនេះសមហេតុផល ព្រោះពេលធ្វើតេស្តត្រូវពាក់ខោអាវពេទ្យ ដើម្បីការពារខ្លួនរបស់គ្រូពេទ្យ។ ប្រសិនយល់ថា ពេទ្យឯកជនថ្លៃ សូមទៅយកសំណាកនៅកន្លែងរដ្ឋរៀបចំ»៕